Main raat ko akele neeche ghoomne kyun aata hun
Lockdown ke ghanton baad
Mai apne ghar se neeche utar aata hun.
Ek-ek saans duniya andar leke
Khud ko behlaata hun
Ke shayad duniya thodi si
ab bhi meri hai.
Shayad uss dare hue insaan jaisa
Jo sadiyon baad kisi pralay ke baad
Duniya mein khud ko iklauta jeevit paayega
ho sakta hai wo darr se zyada
Sukoon mehsoos karey...
Kyunki ek kshan ke liye apni khudi se
duniya ke sarvanaash ko
Jod na paaye
Aur khud ko insaniyat ki collective guilt se
Alag mehsoos kar sake
Saans apne aap mein jab ek bhaar bann jaye
Toh saans ke bagair angdaayi lene ko
Tarasta hun.
Ghar ke andar ye surakshit laash
Baahar gosht ke lothde se thodi zyada kuch
maalum hoti hai
Kyunki saans aakhir udhaar ki hai
Jab aadhi-chhichhli saans lene ki aadat pad jaati hai
Toh jab kuch kshan ke liye poora dum bharta hun
Iske pehle ka har ek kshan
Jhooth lagne lagta hai.
Lagta hai inn khule phepdo ki chhaap
Mann ke kisi surakshit kone mein qaid kar loon
Par sapnon ka kya hai
Jitna yaad karo utne bhool jaate hain
Jab tak wapas oopar aata hun
Neeche jaana yaad nahin rehta
Shayad isliye har roz neeche
Kuch naya dhoondta rehta hoon...
2 comments:
Very nice
Ita very intense and very touching. Very powerfully expressed.
Post a Comment